سلطة الدكوة بالشطة

من طرف ود الشارقة الجمعة يونيو 10, 2011 3:39 am

اول شئ المكونات ..

** كيسين تلاته دكوه (لي ناس السودان)
وعلبه زبدة فول سوداني لي ناس بره (وش حنكوش)

** كم حبة طماطم بس تكون صاحيه شويه

** كم حبة خيار (لي ناس بره)
وعجوره كبيره لي ناس السودان

** بصلايه عينها قوووية
والحناكيش يمتنعون عن المكون ده بالذات

** شوية جرجير وبالعدم يكون (خس)

** كوزين موية

** سكين

يلاكم بعد كده علي الطريقه ..

يوضع إناء كبير ويا ريت يكون (كوريه) او حلة كبيره
وتجيب المكونات دي كلها وتقعد (تحُش) فيها
ولما توصل للبصل احسن حاجه الزول يلبس ليهو (قلفز) ويركب (ماسك) وطبعاً الكلام ده لي الناس الحلوه !
والعزابه الروحهم طالعه يقطعو سااااااي
وكان مافي سكين في البيت (حُش) بي خشمك سااااي
والكلام ليكم يا المنططين اضنيكم

نجيب (ماعون) تاني بس يكون نضيف (اهم شئ النضافه) ونقوم (نكشح) فيهو الدكوه وكوزين المويه
ونسوط فيها (الله يكفينا شر السواطه)
لحدي ما الدكوه دي تبقي موووويه بس !!

نشيل موية الدكوه دي (ونكشحها) فوق المكونات المحشوشه ديك
ونقعد نسوط تااااني ونقلبها مع بعض ..
ويا الفنان النبي فيك تقلب بي معلقه (وبدون سفه) هههههه

بعد داك ممكن (تحلب) ليك ليمونه لزوم النكهة وكده
وللناس الراقيه (الحلوه) اكشحو ليكم شوية زيت زيتون
وللضكور خليكم مع السمسم !!

وبالله كل زول يجيب الملح حقو معاهو ، لانو في ناس كده ما بتريح

وبالهناء والشفاء علي قلوبكم [ندعوك للتسجيل في المنتدى أو التعريف بنفسك لمعاينة هذه الصورة]