هل ما جاء في رواية بنات الخرطوم قصص واقعية ام هي من نسيج خيال الكاتبة

من طرف **Admin** الخميس يونيو 23, 2011 7:37 am

[ندعوك للتسجيل في المنتدى أو التعريف بنفسك لمعاينة هذه الصورة]

غلاف الكتاب افضل ما فيه..لوحة فنية جميلة لفنان سوداني

كنت عايز أكتب الموضوع دة بالعربي الفصيح كمحاولة لنقد الكتاب المذكور لكن وجدت انو الكتاب مكتوب بالرندوك فما بيستحق أكتر من الكتابة بالدارجي....حأحاول أختصر برضو عشان ما أصرف دارجي كتير لأنو الكتاب حاجة نتشة كدة ....ما حأنزل الكتاب ولا أي صفحة منو أحتراما لحقوق النشر..لكن حفاظا على أموالكم حأبيّخو ليكم عشان ما تتمقلبو زيّي وتفتشو الكتاب وتشتروهو وتكتشفو انكم خسرتو 15 جنيه في كتاب تعبان....

الرواية اسمها بنات الخرطوم: قصص واقعية تكشف سقوط البنات السودانيات في شبكات الدعارة العالمية, والعنوان شارح نفسه....وواضح انو الكاتبة متأثرة برواية بنات الرياض التي كشفت من خلال سرد روائي لقصص مغامرات متحررة لفتيات سعوديات في الرياض, فقررت تكتب رواية مماثلة عن الفتيات السودانيات في الخرطوم بدون ما تتعب نفسها وتشوف ليها عنوان مميز..

المؤلفة والمقدمة التلفزيونية في محطات امريكية سارة منصور

المؤلفة أسمها سارة منصور...والزولة دي حسب السيرة الذاتية المنشورة ليها في الكتاب قاصّة وروائية مقيمة في أمريكا ودرست في اعرق الجامعات الأمريكية (أعرق جامعة كدة ساي بدون تحديد اسم الجامعة) وبتعمل مُقدمة في أحد البرامج التلفزيونية الأمريكية (برضو بدون تحديد اسم البرنامج)

الرواية انتشرت في نطاق ضيّق في السودان...شكلو أتمنع من التداول...لكنه متواجد لو أجتهدت في التفتيش...مافي نسخة الكترونية منو في النت. في زول نشر صفحة منو في النت وتعرّض للملاحقة القانونية من الناشر (دار سندباد بالقاهرة)

الكتاب 110 صفحة من القطع المتوسط والخط بتاعو النوع الكبير جدا والمسافة بين السطور كبيرة...يذكرك بأيام المدرسة لمن يكون مطلوب منك تكتب انشاء اربعة صفحات وما يكون عندك حاجة تكتبها تقوم تكبّر خطّك وتفط سطر سطرين عشان تتم الصفحات المطلوبة ويكون اسمها انشاء...غايتة تمّت ال100 صفحة وعملت كتاب ممكن يتباع...تصرُّف

الكتاب مجرد سرد لقصص عن مختلفة عن بنات انحرفو بطرق وأسباب مختلفة...مجموع القصص 25 قصة قصيرة جدا جدا مكتوبة بالدارجي الزي ونستنا دي. والقصص غطّت حالات أنحراف كتيرة ومختلفة (زنا/سحاق/تعاطي وتجارة مخدرات/عقوق والدين/قوادة/خيانة زوجية) بعضها من فتيات عرفتهم شخصيا وبعضها من قصص تن تناقلها في المجتمع السوداني (حسب كلام المؤلفة).

دي الفكرة العامة للكتاب, وجرأة الفكرة ما بتعيّب الكتاب, لكن بتعيّبو الحاجات الآتية

اولا...الكلام ركيك لمن غلط, وما ركيك لأنو دارجي, ركيك لأنو ركيك,خصوصا من زولة قارية في أعرق الجامعات الأمريكية (هيع هيع)...يعني اديكم أمثلة لعبارات متفرّقة من الكتاب :

البنت ميسون خريجة تجارة الفرع وعندها سبعة اخوان دقدق صغار

سهير أنسانة مثقّفة ومتعلمة وفاهمة جدا الا انها ساذجة في نفس الوقت وطيّبة لدرجة العبط

الباقي لي من ايامي في الدنيا عايزة اعيشو وطظ في راجلي وطظ في اهل راجلي وطظ في السودانيين

وآآآآآآآآآآآآآآآآآآآه يا طفلتي الجميلة وآآآآآآآآآآآآآآه يا روح أمك

ثانيا الكتاب مليان قصص محبوكة حبكة تعبانة جدا و معلومات مشكوك فيها ودايرة ليها زول طيب جدا عشان يصدقها...مثلا بتحكي في واحدة من القصص انو في سودانيات في السعودية كانو بيسوّوا العيب مع واحد باكستاني بالقروش عشان يشتروا دهب!! هو الصديك في السعودية مرتّبو كم عشان يعمل العيب بي قروش؟ وقروش بتجيب دهب بي كم؟ وهو الصديك الباكستاني دة بيشتغل 18 ساعة, يجيب حيل للشغلة دي من وين؟ في برضو قصة عجيبة انو البنات في الداخليات بيحملو بدون ما زول يعرفهم, وبيولدو في غرفهم بدون ما زول يعرفهم وبيجدعو الجنين في ممر الداخلية بدون ما مشرفات الداخلية يعرفو الولدت منو!!!دة غير قصة البت الحملت من ولد وواجهتو في الشهر التاسع (هيع هيع) بأنها حامل ويجب ان يتزوّجها!!!وحتلقو معلومات علمية خاطئة في الكتاب, زي أنو السحاق بينقل الأيدز (حِكَم) .

ثالثا الكتاب بيطرح الحالات المذكورة مصحوبة ببض الأنطباعات من الكاتبة وبعض التأوّهات منها (بتقول آآآآآه اكتر من مرّة) بدون ما تقدم أي مسببات علمية لحالات الأنحراف وبدون أي حلول مؤسسية لتقليل حالات الأنحراف (بقول تقليل الأنحراف لأنو الأنحراف ما ممكن يزول تماما والا القيامة كانت قامت). الغريبة انها بتقول انو الحلول هي تطبيق الشريعة الأسلامية!! كأنو السودان محكوم بالقانون الوضعي...

تسابيح تعرّضت لها الكاتبة بسبب خلافها الأسري مع والدها

رابعا..الكتاب فيهو قذف للشخصيات الثلاثة المعروفة الوحيدة الذكرت في الكتاب وهي ندى القلعة (بسبب رحلات نيجيريا) وتسابيح (بسبب موقفها مع ابوها) ونانسي عجاج (برضو لموقفها مع أبوها)..ما عارف كيف مجلس المطبوعات سمح لكتاب يَنشر يكون فيهو قصص نجمات المجتمع الفني والأعلامي السوداني ضمن كتاب يسرد قصص زنا وسحاق ومخدرات؟!!

نانسي عجاج تم التعرض لها ايضا في شأن أسري خاص

ندى والشريف مبسوط منها وجدت نفسها بطلة فصل من اربعة صفحات في الكتاب

الكتاب عامل ضجة لأنو جرئ...لكنو جرئ من اجل الجرأة بس بدون محتوى حقيقي, لا حبكة, لا سرد مشوّق, لا بلاغة في الكتابة, لا شخصيات جاذبة, لا حلول لمشاكل أجتماعية ولا تحليل علمي..وزي ما أسلفنا فيهو كضب كتير ..طريقة الكتابة حتذكرك بكتابات المعارضين في المنتديات الفيها مبالغة شديدة وحتذكرك برضو بكتابات جريدة الدار الفيها سرد فضفاض ومبهم لأحداث بزيادة توم وشمار كتير....تجنبو قراءة الكتاب لسلامة ذوقكم العام..

مخرج: في فصل في الكتاب عن زولة جاتها قروش كتيرة فجأة..لمن سألوها القروش دي من وين قالت ليهم (أعمال حرة تحت الصرة)!

ومن هي سارة منصور وما هي خلفياتها الاثنية والسياسية ..!!!!!!؟؟؟؟؟
افيدونا جزاكم الله الف خير

[ندعوك للتسجيل في المنتدى أو التعريف بنفسك لمعاينة هذه الصورة]

من طرف ود الشارقة الخميس يونيو 23, 2011 10:36 am

علي ما اعتقد ان المدعوة (سارة) هذة هي منحطة في صميم نفسها ولذلك هي حاولت باصدار الرواية النيل من عفة وشرف بنات بلادي المصونات الحافظات لانفسهن ولدينهم وتقاليد مجتمعنا العريقة ولو اطلتعوا علي تفاصيل الرواية لتبينت لكم سادتي انها عبارة عن مجرد خزعبلات تنقصها المصداقية والموضوعية وهي ان اردتوا تقيمها ادبيا فهي مجرد ترهات ومجلد يحتوي علي اسفاف ادبي وانحطاط روائي

اتقي الله يا سارة السجم

هل ما جاء في رواية بنات الخرطوم قصص واقعية ام هي من نسيج خيال الكاتبة

هل ما جاء في رواية بنات الخرطوم قصص واقعية ام هي من نسيج خيال الكاتبة

رد: هل ما جاء في رواية بنات الخرطوم قصص واقعية ام هي من نسيج خيال الكاتبة